RAMCAR or NUNCAR
Cu caan ah cun Tipil petu Johan kha a hung chuak i Judea ram ramcar chungah khan phung a chim.(Mathai 3:1) Cu caan lioah cun Zekhariah fapa Johan sinah ramcar chungah khan Pathian bia cu a phan. 3 Cucaah Jordan tiva hrawn hrawngah khan Johan cu aa chawk (Luka 3:1-3)Isreal tuanbia ah Malakhi le Mathai kar lak kum 400 chung hi profet aw pakhat hmanh theih a si lo.Phun dang in kan chim ah cun Judah mi nih Pathian aw pakhat hmanh an thei lo ti nak a si.Judah mi hi Pathian he an I pehtlaih lo ca ah an Nun a car lio te a si.Cu ca ah Tipil petu Johan cu Judah ramcar chung ah a chawk a ti tik ah hin, an um nak ram a car mi nak in nuncar dir hmun in an um lio ah Pathian bia cu an sin a phan ti nak a si.
Ramcar nun nak in Nuncar nun a har deuh.Nun ti hal a har deuh.Pathian aw theih nak hmun khua zeihmanh ah nun a hninghno i zei tluk khua le ram tha kan um zong ah Pathian he um lo nak hmun ah Nun a car.
Shur RAMACR le Sin RAMCAR.Shur ramcar hi Rilisen an tan hnu ni thum ah an phan.Pathian an thangthat an lawmh hnu ni thum ah a si.Tikha an tawn tik ah moses sin ah an zai colh.Izipt in an chuah hnu thla hnihnak thla, a ni hleinga ni ah Sin ramcar kha an phan, an dihlak in Moses le Aaron cungah khan an zai.(Exodus 15,16) khuaruah har in rilisen a tan pi tu Pathian kha an thangthat.Hla hna an phuah.A si na in an vuival colh. khua ruahhar a tuah mi cung ah cun an I lawm na in a tuahtu Pathian cu an lawmh ter lo. Cu ca ah a nun a car.,vawlei ramcar an phak tik ah nuncar an si a lang colh.Nun car nih a chuah pi mi cu vuivai kha a si.Pathian kan bochan i a mah Pathian nih a kan um pi ko ah cun Ramcar kha ram hninghno a thleng kho tu cu Pathian a si.Pathian ca ah Ramcar a um kho lo.Tikha kha ti thlum ah a can ter colh i tlawmpal an kal ah ti a put nak cerh pahlei hnih le ungkung sarih umnak a phak pi ko hna.Cun van in rawl a sur ter.Ram car an ti mi zong ah Pathian nih tuanvo a lak bak hna.(Halleuiah)
Aw pakhat nih, "Bawipa caah RAMCAR chungah lam pakhat sial u! Kan Pathian caah thetse ram i lam cu sial u. 4 Horkuang vialte cu chilh an si lai i tlang vialte cu chimh an si lai. Tlang cu hmun rawn ah an cang lai i a bingbomi hmun cu rawn didiai in an um lai. 5 Cun Bawipa sunparnak cu a lang lai i mi vialte nih an hmuh lai. Hi biakamnak cu Bawipa hrimhrim nih a tuahmi a si," a ti.(Isaiah 40:3-5)
Cu ca ah RAMCAR kan tawn zong ah kan Nun a car lo a biapi.Kan Nun a car ah cun zei zong vialte an car.Isaiah nih a chim bantuk RAMCAR chung ah khan Bawipa ca ah lam kan sial hna lai.Bawipa cu nun hninghno ter tu ,ram hninghno ter tu,Nun duhdim a kan pek tu a si.Kan umnak hmuh poah a kan um pi i a um nak poah ah a kan um ter tu a si.Khua zei ram kan phak zong ah Bawipa umpi kan si ca ah RAMCAR a um kho lo.A min thangthat in um ko seh.Amen.
Comments
Post a Comment