TUUKHAL LUNGPUT
Pa Hrang Hmung
Tuukhal lungput ti mi konghe pehtlai in Pathianbia ah ka cawnmi chung in langhter ka duh.
1.Tuukhal(Shepherd) ti mi biafang hi Salm 23 ah kan hmuh.David bia a si.David nih TUUKHAL a ti mi hi Pathian kha a chimduh mi a si ti a fiang.Cun Salm 23 nih hin Tuukhal nih a zohkhenh mi hna cung ah a lungput le tuu nih tuukhal cung ah an ngeih mi an lungput fiangtaktak in kan hmuh.Tukhal le tu hi thenawk tha lo in pehtlaihnak an ngeih nak zong kan hmuh. Tuukhaltha thawngin hnangam nak,ralthat nak,bochannak an ngeih nak nih Tuukhal nih tuu cung ah a lungput a langhter ngai ngai.Tuukhal rian a khinh mi hna nih kan cawn ding mi le kan zohchunh ding mi a si.
2. Bawipa Jesuh a thawhthan hnu ah Peter sin ah a chim mi cu
- Ka tuufa tete kha cawmhna.(Feed my Lambs)
- Ka tuu kha cawmhna(Shepherd My Sheep)
- Ka tuu kha zohkhenh hna(Feed my Sheep)(Johan 21:15-16)
Jesuh le Peter bia an i ruahnak ah kan hmuhmi cu Tuu hi kan mah ta a si lo.A ngeitu cu Pathian a si.Pathian ta tuu kha a cawm tu le a zohkhenh tu kan si tikha a fianter.Cu ca ah a ngeitu nih a tuu hna pek a duh mi rawl in kan Cawm hna ding le zohkhenh ding ah a kan pek mi hriamhrei in kan zohkhenh awk a si .Cu bantuk in kan cawm khawh nak ding le kan zohkhenh khawh nak hna ding ah cun a ngeitu a duhnak kha fiante in kan theih ve lawng ah,a tuu kha a duh ning in cawmkhawh zohkhenh khawh kan si hnga i an thanglian hnga.Kan mah nih a herh kan ti mi le si hna seh tiah kan duh ning in zohkhenh awk a tha lo i a ngeitu nih si seh ti a duh mi an herh ti a hngalh mi ning te in zokhenh tu ding kan si.Tuukhal rian khinh mi hna nih kan cawn ding mi le kan zoh chunh ding mi a si.
3.Tuukhal ṭha cu keimah hi ka si. Tuukhal ṭha cu a tuu hna caah a lu hloh kha a sian. Man phalh in hlan chommi kha cu, tuukhal a si lo ca le tuu kha a ta an si lo caah, cenghngia a rat kha a hmuh tikah a zam i tuu kha a lektak hna. Cu tikah cenghngia nih cun tuu cu a seh hna i a ṭhek dih hna. Hlanchommi cu hlanchommi lawng a si caah le tuu kha an zawn a ruah hna lo caah a tli ko.(Johan 10:11-15)
Jesuh tuukhal tha sin in cawnding mi hna.
Tuu hna ca ah nunpek.
Tuu ngeitu nih kan nih cu a tuu hna ca ah nunpek ding in fial mi kan si. Jesuh nih cun Cuticun pei Mi Fapa hi a si cu, rian ṭuanpiak dingah ka rat ṭung lo, mi tampi an rian ṭuanpiak awk le annih tlanhnak ca i ka nunnak pek awkah pei ka rat cu," tiah a ti hna(Mathai 20:28)Member sin in hmuhding mi ruahchannak he tuukhal rian tuantu si lo in ka sinak vilate pek in tuukhal riantuan tu ding kan si.
Manphalh hlanchom mi .
Pathian auhnak theih lo in pawcawmnak ruah ah tuukhal riantuan kan um len.Um len lo awk a tha lo.Vawlei cung rian pakhat ah ruah khawh a si.Hi bantuk dir hmun in Pathian Tuu hna khal kan si tik ah mah reitheih nak dah ti lo zei hmanh kan co ding a um lo.Cun kan zohkhenh mi Tuu hna ca ah zong ah a tha hnem nak a um lo.Hlanchawm,manphalh rian tuan in kan tuan. Manphalhchom tuukhal hna nih tawn leng mang mi hmuhtawn mi chung in langhter ka duh.
Pastor(TuukhaL) kan tik ah hin riantuan nak hmunhma hoih in riantuan ning cang le ruah mi le tuah mi a dang.Cheu khat cu zungriantuan dirhmun,cheuhkhat cu Evanglist,Cheuhkhat cu mission riantuan dirhmun in Pastor an tuan,A tam deuh cu Khrihfabu ah Pastor tuan a si.Tuan ning a dang cio.Cu hna chung ah hin Khrifabu Pastor cu rianvialte kemh dih a si ca ah a har bik mi rian a si.
Pathian thawngin Pathian rian katuan nak kum 42 chung ah hin Pathian riantuan phun dang dang le hmun hma dang dang ah a tuan mi ka si.Khrihfa bu zokhenh Pastor rian hi a tu hi ka thawk ti tluk a si.Riantuan ning lak ah hin Khrihfabu zohkhenh Pastor rian hi a rak phundang deuh ngai in ka hmuh.Ka rak i ruah ning nak in a har deuh.Baibal sianginn kan kai lio i kan cawn mi nak in hmuhtawn mi nih a ka cawnpiak mi a tam deuh.Evangelist zong si a hau,Missionary lungput zong ngeih a hau hi rianvialte kemh a si ca ah a har khun.Pakhat lawng ngeih I,I tlaih peng in khrihfabu hruai awk a tha lo.
Cun chinmi zumtu(Member) lungput nih Pastor riantuan a tluangter lo .Member nih Pastor a kan hmuh ning nih member he kan sining a kan then.Hmunkhat a kan um ter lo.Pastor cu mi ca ah riantuan tu ding.Mi cawn piak tu ding,Mi a bawnchan tu ding,Zei ti kan ti zong mi a ngaih thiam peng ding.Zei bantuk dir hmun in a si zong ah a dir kho peng ding.A tha a der kho I thinhun kho lo phun in a kan hmuh.
Pastor hi zei tin dah tha pek ding a si,zeitin dah dawtnak langh ter ding a si,an chung khar le a mah pumpak ah zei dah an herh mi le an chambau mi a si,zei tin dah kan bawmh khawh hna lai ti a ruat mi an tlawm tuk.A bik in Khrihfa upa le lutlai hna an si.An nih hi Pastor he pehtalihnak a ngei bik mi an si.Cu tik ah Pastor kan lungput a thleng i duhdsah te in Khrihfabu he lungthin ah a kan hlat ter deuh deuh.
Khrihfabu siaherhnak le duhpiaknak a zawr i nuamh lo nak nih khrihfabu a zawter .Hi bantuk sining nih Pastor chungkhar lung a donghter tawn i tuukhal riantuan an kal tak tawn hna.
Steve Drey nih Rev.Alexander Lang First Presbyterian Church Pastor kong hmuhtawn mi Article a tial mi (Why I leave the Church) ah Pastor sinak in dinh a duh nak a ruang hna a tang lei bantuk in a langhter.
1. Rian a tam tuk ruang ah(The immense of the Job) 56%
2. Mah lawng tuar innak(I feel lonely and isolated : 43%
3. Then cheu duhnak le thleidan nak (Current political divisions) 38%
4. Hihna ruang ah hin inn chungkhar nuamh lo nak (I am unhappy with the effect this role has had on my family):29%
5. Khrihfabu ca ah hmailei ruahchan nak ka ngei kho lo (I am not optimistic about the future of my church): 29%
Pastor nih an tawnmi hna cu Ka tling lo tiah thachiatnak an ngei.Reserch pakhat lebang ah cun Pastor tam deuh hi an tuan chung ah voikhat tal cu Depression anngei dih an ti.Lungtho ngai in an I ot.An ruah ning in a kal kho loh.An hlawh a tling lo ,cu tik ah an lung a dong.Khrifabu tlamtlin lo nak vialte ah a mah mah ah aa ruah dih. Puh dih a si ve.Hawikom tha a ngei lo.Pastor hi mi tampi he pehtalih peng mi a si ca ah hawi tampi ngeihmi a lo na in hawi tha tak tak a ngei kho lo.A ton ngai ngai theipitu a um lo tluk a si.Cu ca ah a thlavai a kiang.Amah lawng thilrit kan phut ter.Minung a si ve philh a fawi te.(Rev.Van Hlei Thang lecture note)
Kan hmurka in kan chim lo i kan phuang cio lo na in kantawn cio mi a si kho men hna.A cunglei i ka langhter mi Tuukhaltha Pathian lungput le Jesuh khrih nih Tuukhal hna dirhmun a chim mi hna ning in Tuukhal rian hi kan tuan ah cun teikhawh lo mi ding mi a um lo.Kan tei khawh lawng si lo in Pathian Tuurun nih Pathian hmuh in a kan hmuh can a phan lai i a kan bochan can a phan lai Pathian aiawh in a kan upat can a phan lai.Cu vilate cu kan mah sunparnak ding ca ah si lo in Pathian nih a rak timh cia mi asunparnak ca ah a site tik ah cun Pathian sadhuh thah a tling hnga.
Paul cu Efesa khrihfa upa pawl nih Jerusalem kal lo ding in an thlauh len lio ah a chim mi cu “Ka hngalh mi cu Thiangthlarau nih a ka chimh bantuk in khuakip ah thongtlaknak le har nak nih anka orh ko ti hi a si.Si hmanh seh law Bawi Jesuh nih a ka fial mi rian,Pathian vel ngeihnak thawng in chim hi ka lim khawh paoh ah cun ka nunnak hi cu zeihmanh ka rel lo”(Lamkaltu 20:23) ti hi a si.Tuanvo pek mi a rian zumhawk tlak te in kan tuan ah cun a kan fialtu pa nih kan ca ah a tlingmi tuanvo a kan lak piak ve lai.
Comments
Post a Comment