BIAKNAK TAK TAK(TRUE WORSHIP)
24/04/2022 Pa Hrang Hmung sermon
Kan i pumhnak tik ah chimbik mi cu Thawngtha chimtu a that le that lo hi a biapi bik ahkan ruah cio mi a si.A si na in biangaitu mipi zei tluk in dah kan biapi ti mi a ruat tu kan tlawm ngai.Biangaitu mipi pumpak zei tluk biapi dah kan si ti hi a bia hmang in langh ter ka duh.
Pathian kan biak ningcang hoih in Baibal nih a kan cawn piak mi kan hmuh khawh mi pathum lak ah hin zei bantuk dir hmun ah dah ka um ti zoh hmasa u sih.
1. Mah nih a tha ti ning biak.(Kolose 2:23) Vanmi nan biak hna lai, nan pum nan i hrem lai, an ti i mi toi aa dormi ko an lawh tikah hin, hi phunglam hna hi fimnak chungchuak thiltha a si ding ko khi an lo; asinain pumsa duhnak tei khawhnak ding taktak ah cun zeihmanh santlaihnak an ngei lo
2. Santlai lo mi biaknak.Jesuh nih cun a leh hna i, “Nannih kong a rak chim tikah hin Isaiah hi a va hmaan dah! A tial bantuk tein miziathiam nan si taktak ko. A tialmi cu hitihin a si:‘Pathian nih aa thawh i,Hi mi hna nih hin an bia cunan ka upat ko,Asinain an lung cun an ka hlat taktak. Annih nih minung serchommi nawlbia khaPathian nawlbia taktak bantukinmi an cawnpiak hna caahAn ka biak hi an caah zeihmanha thahnem lo,’ a ti.(Mark 7:6-7)
3. A dik mi biaknak(John 4:23-24) Pathian cu thlarau a si i a biatu hna nih cun thlarau le biatak in an biak awk a si,” tiah a ti.
Pathian he kan i hawikomhcan a tlawmtuk ca ah Biakinn kan phak can tal ah hin cun Pathian kan biak ning cang hi pumpak cio nih kan ruah a herh tuk.Pawngkam thil nih kan nun a lak dih i Pathian can pek can a tlawmtuk ca ah kan ngeih can hi biapi ngai in kan ruah cio ding a bia pi cang.
Biakinn pumh daithlan hi thlarau lei tumchuknak ngan pi a chuah pi.zumhnak hnu tolh si nak a langhter tu a si.Hebru ca uk tialtu pa nih zumhnak a kaltak mi Hebru mi hna a cawnpiak nak hna ah pakhat in a telh mi cu Biakinn pumh daithlan nak hi a tel mi a si.
Pakhat le pakhat hmun khat i i pumh lengmang kha ngol hlah u sih; a cheu nih cun ngol hmanh hna seh law, kannih cu i forh chin u sih, zeicahtiah Bawipa Ni cu a nai deuh chin lengmang ti kha kan hngalh caah i forh chin lengmang ko u sih.(Heb 10:25)
Jesuh zong nih pumhnak i tel hi a mah bawmh a si.A mah he pumkhat si nak langhter tu a si a ti.Keimah a ka tanh lomi cu a ka ralmi an si; pumhkhawmh a ka bawm lomi cu thektu an si(Mathai 12:30)Pentikost zumtu thar hna hi zarhkhat voikhat Biakin pumh lawng a si lo a tu le a tu an pum thlaruapum sa in zeizong vialte an I hrawm nak nih a langhter.
Ni fate in a bute in biakinn chungah khan an i pum i an inn ah khan rawl an i hrawng cio hna i lunglawmhnak lungthin le toidornak lungthin he rawl cu an ei. Pathian kha an thangthat i mi vialte nih an hmaizah hna. Cun khamh a si liomi hna cu Bawipa nih ni fate in an bu chungah khan a luhter lengmang hna.(Lamkaltu 2:45)
Jesuh nih a chim rih mi cu,Zeicahtiah ka min in pahnih pathum nan i pumhnak ah kei zong nan sinah ka um ve,” tiah a ti.(Matthew 18:20)Biakinn chung kan thutnak ah khan Pathian a um ko.A si na in a min in na thut lo ah cun a mah kha na ruah lo ah cun na sin a um kha na thieh lai lo.A um na theih ah cun na nun an ser colh lai i a mah biak ding ah ka ra ti kha na theih colh lai.Praise worship nih na nun ser loin thawngtha chim le Programme kha awrh si lo in Jesuh thiangthlarau nih na thut bak khan an sercolhkhawh nak hnga thlacam colh ko.
Na biakinn chungah ni khat um cu hmun dang i ni thong khat um nakin a tha deuh.Mithalo mi hna inn chung i um nakcun ka Pathian inn kutka hram dir hmanh ka duh deuh.(Salm 84: 10)Biakinn chung ah Pathian he pehtlaih nak ngeih mi nih khan zarhkhat chung na tawn mi har nak vial te kha khrih chung ah na lawmh nak nih an philh ter dih lai i lawmh nak in na khat le.salm ca uk nih Kum thong khat hi nang caah cun ni khat bantuk a si; a dih cangmi nizan bantuk khaa si ko,zan khat chung i suimilam can tawite pakhat bantuk khi a si ko. (Salm 90:4)a ti bantuk in a si lai.
Pathian he biakinn chung ah pehtlaih nak kan ngeih lo ah cun kan nun cu kan mah nih seitan umnak mi fir kua ah kan ser a si.“Cathiang chungah, ‘Pathian nih ka inn cu thlacamnak inn a si lai, a ti,’ tiah aa tial. Sihmanhsehlaw nannih nih cun mifir kua ah nan ser cang,” tiah a ti hna. (matthai 21:13)Nan nih cu nan pa nih a tuah mi kha pei nan tuah ko cu,an nih nih Pathian lawng lawng pe ikan pa cu a si ko cu,….nan nih cu nan pakhuachia fa kha tuah nan duh mi nan pa duh nak kha a si.(Johan 8:41-43)
Biakinn ah Pathian he bia a ruah I hna ngam nak a hmuh mi hna cu Biakinn an ngai I Biak inn phaklai an ngaih tuk.Sazuk nih rial tidai a ngaih bantukin Maw Pathian nangmah cu kan ngai.2Maw a nungmi Pathian, nangmah cu tihal in kan hal;zeitik ah dah na umnak ah ka hunkhawh lai i kan biak khawh lai?Chun nitlak zan khuadei in ka tap I ka mitthli lawng kha ka rawl cua si ko;ka ral nih, “Na Pathian cukhuazei ah dah a si kun?” tiahatu le atu an ka ti lengmang.Hlanlio kong kha ka ruah tikahka lung a leng;Pathian inn i mi zapi he kan rak kal I kan kal tikah keimah ika rak hrui hna iPathian thangthat in lunglawm le thanuam inhla kan rak sak i kan rak au khaka ruah tikah ka lung a leng hringhran.(Salm 42:1-4)
Biakinn chung ah hin Pathian nih kan lungput le kan sining hi a kan ngiat a kan zoh hi philh hlah u sihJesuh cu Biakinn tangka chiahnak pawngah khan a thu i tangka a sanhmi kha a zoh hna.(Mark 12:41-44)
Pathian nih rak ka biak uh a ti nak kan hmuh hmasa bik nak hi Genesis 22:1 ah hin Pathian nih Abraham kha Moriah tlang ah na ka Biak lai a ti.Moriah tlang hi a hnu ah cu Zion tlang,Jeruslem temple a um nak tlang ,Pathian tlang Pathian a rak bia hmasa tu hi Abraham a si.
Abrahamnih thaizingka ah raithawinak tuah ding ah timh tuah nak a tuah.Biak inn kan rat lai tik ah hin timh tuah nak kan ngeih a hau.Ni thum a kal hnu ah lamhla in Moriah tlang kha a hmuh tik ah. A sin um pawl kha a kal tak hna.Pathian biak tik ah dawntu ding kha kal tak ti nak a si. Pathian nih a herh a ti mi lawng kha a kal pi.Pathian a herh a kan ti mi cu zei dah a si.kan thinlung kan pek hi a si.lungthin tak te in Pathian he bia I ruah kha a si.
Isaih 1:2-18) 2 BAWIPA nih aa thawh i, “Van le vawlei hna, BAWIPA nih ka chimmi hi ngai tuah u. Ka cawm cia le ka ken cia ka fale nih hin an ka doh. 3Caw nih a ngeitu kha a hngalh i laa nih a bawipa nih rawl a peknak kuang kha a hngalh. Sihmanhsehlaw ka mi Israel mi hna nih cun cu hmanh cu an hngal lo. A hngalh in an hngalthiam hrimhrim lo,” a ti.
4A! misual phun, that lonak in a khat i dinlonak a tuah pengmi hna, nannih cu nan lo cang. BAWIPA Israel Pathian Thiang cu nan hlawt i hnulei nan chit caah nan sualnak nih chuk ah an hnuh cang hna. 5Zeicahdah nan puar chin lengmang ko? Fak chinchin in dantat maw nan duh? Israel mi hna, nan lu cu hma a khat i nan lungthin le nan ruahnak cu a zaw. 6Nan kechik in nan luthlung tiang, nan pum cungah hin khuazei hmanh ah damnak a um lo, hma le rung in nan khat dih. Nan hma cu an in òawlpiak hna lo i an in tuampiak hna lo. Si zong an in thuhpiak hna lo.
7Nan ram cu a rawk dih i nan khua cu an kang dih. Nanmah mit hmuh hrimhrim ah ramdangmi nih khan nan ram cu an lak i an hrawh dih. 8Jerusalem lawng a tang, cu hmanh cu ral nih an kulh dih § mitsur lo chung lo hngaktu thlam bantuk ceo a si, zil lo chung deu bantuk ceo a si cang. 9Ralkapbu BAWIPA nih mi kha tlawmte tanter hna hlah seh law, Jerusalem cu a rawk dih cikcek taktak cang hnga, Sodom le Gomorrah an rawh dih cikcek bantuk khan a rawk dih cikcek ve cang hnga.
10Jerusalem, na uktu bawi hna le na mi hna hi Sodom le Gomorrah khuami bantuk kha an si. BAWIPA nih an chimhmi bia hi ngai tuah. Kan Pathian nih an cawnpiak mi hi òha tein ruat tuah. 11
Pathian nih cun, “Nan ka pekchanh lengmangmi thawinak vialte hi a duh ko hna ti ah maw nan ka ruah? Khangh thawinak caah tuu nan khanghmi hna le nan saòil òha bikbik hna thau nan khanghmi hna hi kaa za diam cang. Nan cawtum hna le nan tuu hna le nan meheh hna thi nih hin a nor in an ka nor cang. 12Keimah biak awk i nan rat tikah, hi vialte hi nan tuah lai, tiah aho nih dah an in ti hna? Ka Biakinn chungah hin torcawl len u, tiah aho nih dah an in fial hna? 13Man ngei lo nan ka pekchanhmi thil hi ka duh ti hna lo. Nan ka pekchanhmi zihmui rim hi ka luak a chuak. Nan Thla Thar Puai te hna, nan Sabbath te hna, nan biaknak pumhnak tehna hi a in in ka ing kho ti lo; nan sualnak nih a thutter dih cang hna. 14Nan Thla Thar Puai hna le nan ni thiang hna cu a huat in ka huat hna. Ka caah a phorh ka zuam ti lomi thilrit an si.
Bawipa nih aa thawh i, “Atu cu hi bia hi thate in ruat ti tuah u sih. Nan sualnak cu a sen in sen hna hmanh seh law, hawhra bantukin an thiang hna lai; a dum in dum hna hmanh seh law tuuhmul bantukin an vaar lai. Ka bia nan ka ngaih paoh ahcun, ram nih a chuahtermi thil tha kha nan ei hna lai. Sihmanhsehlaw ka bia kha nan ka al i nan ka doh ahcun nan thi ko lai. Hi bia cu BAWIPA nih ka chim,” a ti.Pathian nih Biakinn chung ah hin a mah Biak,le a mah he biaruah hi a kan duh mi a si.
Ngaihmanh! innka ah ka dir i ka kingh. Ahohmanh an si ah, ka aw a thei i innka a ka hunhmi cu, a inn chungah cun ka lut lai i a sinah rawl ka dum lai i amah zong ka sinah a dum ve lai.(Biathlam 3:20)
(John 4:23-24) Pathian cu thlarau a si i a biatu hna nih cun thlarau le biatak in an biak awk a si,” tiah a ti.
Pathian nih thluachuah pek ko seh.Amen
Comments
Post a Comment