1. Mi chambau lawngte kan si.
vawlei cung minung hna lak ah zangfah awk tlak a
simi hna cu khuaruah tuaktan khawhnak a tlaumi hna khi an si. Vawlei cung ah
hin minung billion 8 hrawng kan um ti a si. Hi zat minung ah hin lungthin a
khatmi ruahnak vialte a lungtlingpi khomi aho hmanh kan um hna lo. Asinain lung
i tlinpi kho kan si ko timi lungput nih hin lung i khah chin lonak a chuah pi.
Kan i khat kho lo ding a si ko timi a theih thiamnak tu nih hin remnak a
chuahpi tawnmi a si. Cu nih a langhtermi cu minung aho hmanh hi mi tlamtling
theih dihtu dingthlu lairel kan um kho lo ti a fianter. Tlamting kan i zuam i
milungtlinter kan i zuam deuh deuh tik ah kan chambaunak a lang chin lengmang
tu khi kan si.
Tlamtlingnak a ngei lomi minung hna sin ah
tlamtling tein a kanfun tom khotu cu minung a sertu le a ngeitu Pathian a si.
Zei caahtiah ahcun Pathian cu a kan sertu a si. Minung kan sinak tak tak kan i
theih khawh nakhnga le Pathian nih baibal hmang in a kan cawnpiak i cu Pathian
bia a fianter khotu cu Amah Pathian lila sin lila in a rami Thiangthlarau hi a
si, “Hi
vialte hi nan sin ka um lioah hin kan chimh hna, sihmanhsehlaw ka Pa nih
ka min in a run thlah laimi Bawmtu, Thiang Thlarau nih cun zeizong vialte kha
an cawnpiak hna lai i kan chimhmi vialte hna kha nan lung an pemter hna
lai. (Johan 14:25).
Chim duhmi cu Thiangthlarau bawmhnak a um lo ahcun
tlam a tling lo minung ruahnak a si ko lai ca ah hmual a ngeimi Pathian bia a
si kho lai lo. Pathian duhnak a zulmi khomi nun a tleng kho lai lo. Pathian
muicuang nun thlentertu cu Thiangthlarau nih fiannak a pekmi Pathian bia lawng
a si. A fiang ngai mi pakhat baibal cacang a um
Zeitintiah Pathian bia cu a nung i a ṭhawng,
kaphnih har vainam nâkin a har deuh, nunnâk le thlarau, hliahhlok le thlik
tiangin hlang lakin a cheu khawh, lungthin in timhmi le ruahnâk kha a hngalh
dih (Hebru 4:12) hmual a ngeihnak a langhter. Hmual a ngei lo ahcun a nung
Pathian bia si loin a nung mi Pathian bia kha a thimi minung bia in kan fianter
i kan i lak tawn ti a langh tertu a si. Pathian fale caah zeitik can poh ah a
bia tak tak in theih kan herhmi le kan i cinken i kan hman zungzal dingmi cu
Thiangthlarau hruainak in kan nun a kan hruai i Pathian tuahmi thil vialte in
kan nun a kan fianter peng lawng ah Pathian he aa then lomi Pathian hruaimi nun
a ngei mi kan si lai.
2. Thlarau mei in thial piak kan sinak hnga lo kan
i ralring peng a herh,
Sihmanhsehlaw ka lung na si lonak a um: cucu hmasa
i na rak ka dawt bantuk khan na ka daw ti lo. Zeitluk niam i na tlak cang kha
philh hlah. Na sualnak kha mertak hna law hmasa i na rak tuah tawnmi kha tuah
than hna. Na sualnak kha na mertak hna lo ahcun, ka ra lai i na mei vannak kha
a umnak hmun in ka thial lai. (biathlam 2:4-5).
Bawipa bia cu Samuel
sinah a ra phan: “Saul cu siangpahrang i ka rak ser caah hin kaa ngaichih;
zeicahtiah keimah zulhnak in aa mer cang i ka nawlbia kha a tuah hna lo,” tiah
a ti (1 Samuel 15:10).
Bawipa thlarau cu
Saul sin khan aa thial i Bawipa sinin
a rami thlarau thalo nih Amah kha awlok a chonh (1 Samuel 16:14).
Pathian Thiangthlaru thial piak kan si sual ahcun
kan nun a car i mi nun zong car ter khawh kan si ca ah kan i ral ring ngai ngai
a herh nak cu a si. Na nawlbia chung i a ummi khuaruahhar biatak khaka
hmuh khawh nakhnga,ka mit ka auter ko (Salm 119:18) tiah Pathian sin ah thlacam
zungzal awk kan si.
3.Thiangthlarau khuahmuh khawh nak
Pathian thlarau nih a hruai mi hna caah tih a nung
ngaimi cu Thiangthlarau mit hmuh in khawhnak nun satan nih a kan fir piakmi hi
a si. Thiangthlarau mi khua hmuh khawhnak fir piak hi Seitan nih zumtu hna
hrawhnak hriamnam pakhat a si. Thlarau mit hmuh khawhnak in pial ah cun Pathian
sin in tlau a si ko. Tih a nung tuk. Thlarau thazang a derter. Kanmah thazang a
der cia cu chim lo vawleicung Pathian mi hman tam pi Thiangthlarau khuahmuh
khawhnak firpiak an si caah khrifa sinak in a let mi tampi an um cang.
Thiangthlarau hmuhkhawh nakin mi kha hruai ding a simi kha minung tu nih a mah
ruahnak in Pathian bia kha a kalpi ca ah hmual ngeihnak a tlau chin lengmang i
khrifa sinak hmual tepnak a tlauthluamah caah Pathian a um lo ti a phakter cu
khuaruah har awk a si lo. Samson a donghnak mit khoih a tawnnak hi Thlarau khua
hmuh khawhnak a sam firpiak a si caah a si. Thlarau thawnnak lakpiak a si hnu
ah cun vawlei mit khoihpiak a si i a donghnak a pumsa thih nak le rawhralnak a
phan.
4.Thiangthlarau khuahmuhnak a tlautik ah mah le mah
i hmuh a si.
Job hi Pathian nih a duh tukmi pa a si i Satan
hmaihmanh ah Pathian nih a chuah pi ngammi pa a si. Asinain harnak tak tak a
tawn tik ah Thiangthlarau khua hmuh khawhnak a tlau i amah le mah zangfah nak a
ngei. Pathian duhnak thiangthlarau in kawl loin mah cung ah a tlungmi kong
lawng tuaktannak nih thlarau khuahmuh khawhnak a dawnh tuk.
- Jobnih hrin a sinak khaa tah (2).
- Job nih a umtu ningkhakha a tah (10)
- Job nih a sual lo kha a chim (13).
- Pathian nih a cungter mi ruang ah Job a zai (16).
Pathian nih Job bia a hal vawlei ka ser lioah
khuazei ah dah na um. Ka let tuah. Chinduhmi cu na theih lomi ah keimha ka
tuahmi cungah Thliangthlarau in hmuh i zuam in nun na tim lo i na fimnak le na
thluak in na tuak tan, na ka phan kho lai maw? Ka kong na cawn len zongah na
ruahnak in na hrihfiah zong ah na chuah kho lai lo tinak asi.
Pathian nih hin Porhlawt hi a ing kho lo. Mitha lo
hi a huat hna. Lih a chimmi hi a hrawh dih hna. Mi puarhrang le mi hleng hmang
hi a nautat hna. Pathian nih hin misual cu a dawnak in sualnak le a thiang lomi
cu a huat tuk. Hi bantuk a kan fihtertu le a kan hrialter khotu cu
Thiangthlarau a si. Zuding bu hna in Khrifatha si i Pathian fihmi a si. Khaini
hna le, porhlawtnak hna hman bu i zumtu ka si hi Pathian zei ah kan rel lo bia
a si. Na nu pi nih a duh lomi na tuah i nan pa a duh a duh lomi na tuah tik ah
na nuam bal maw. Zei caah dah Pathian nih a duh lomi a fihmi hna cu ral tha
ngai in an tuah. Thiangthlarau khua hmuhnak a ngei lomi kan si.
5.Pathian nih mi vialte a kan dawt na in mi vialte
hi a kan hruai lo.
Kan baibal cauk chung ah hin depressed a tong mi
pahnih an um. Cu hna cu, Hagar le Hannah an si.
Hagar cu Egypt minung a si, zum lotu a si. A nungmi
Pathian thei lotu a si. Nehsawh thlanglam a tawng. Vawleicung ah umnak hmun
ngeih lo tiang a um. Voihnih a zam, a zamnak poh ah Pathian nih a chawnh i a
bawmh. Pathian nih a umpi peng. Asinain Pathian duhnak zulh in a nung lo.
Pathian sinah a ka hmuhtu Pathian cu ka hmuh cang a ti. Asinain Pathian nih a
hruai lo ti cu a tuanbia ah kan hmuh khawh. Pathian Thlarau nih Pathian duhnak
theih khawh le zulh khawhnak lam ah a hruai lo tinak a si.
Hannah cu zong nehsawh thlanglam a tawng bak vemi a
si. Asinain a nih cu Pathian sin ah a phi a kawl, Thla a cam. Thacam hi Pathian
duhnak a theitu Thiangthlarau thazang pek a si. Thla cam lo nun nih
Thiangthlarau hruainak le Pathian duhmi kha theih khawhnak nun a ngei hrim hrim
lai lo. Hannah cu a herhmi Pathian a pek. Mithmaitha a hmuh than. A fa zei
tindah tuah ding a si ti tiang Pathian Thiangthlarau nih a hmuhsak a cawnpiak.
Cawnpiak ning tein a fa pa zong Pathian nih a hruai i sualnak lak ah a um ko
cuah mah lio zong ah a tlu kho lo. Pathian duhnak a thei khomi le Thiangthlarau
fim chimh cawnpiak hruaimi si cu zei tluk in dah a bia pi.
Thiangthlarau khua hmuh khawhnak nan ngeih cionak
hnga thiangthlarau nih i bawmh cio ko hna seh. Amen
Comments
Post a Comment