NUN CU KHRIH A SI

 

Bible cherhchanh: (Filipi 1:12): “Ka u le ka nau hna, ka cung i thil a tlungmi kha Thawngtha karhtertu a si lehlam ti kha hngalhter kan duh hna”. “Pathian nih Thawngtha tanh awk rian cu a ka thiah kha an hngalh caah, cu bantuk lungthin thiangte he a chimmi hna nih cun, keimah an ka dawtnak lungthin chung khan an chimmi bia cu an chim” (1:16).

Paul nih Nun cu khrih a si ko timi chung ah a nun hruai tu cu Thawngtha mi sinah chim hi a a si. Zei ruang ah dah Paul nih hin Thawngtha hi hi tluk in biapi ah a chiah i thawngtha nih hin nun hi a uk khawh.

Thawngtha sullam cu Greek in a ra mi a si i “Euagilion” ti a si. A sullam cu “Good news” a thami thawng tinak a si. A sullam kan fian khawhnak ding ah atu  kan kawlram ah thawngchia tak tak cu ralkap ni uknak an lak. Ralkap hi Federal ralkap nih an tei i mipi sinah uknak an pek ni cu kawlram mipi caah thawngtha bik a si lai.Cu thawngtha nih cun mipi temtawn kan sinak chung in luatnak kan hmuh ni Thawngtha a si lai.

Paul caah Thawntha cu khrih Jesuh thisen thawng in a sual ngaihthiam a si i Pathian hmaiah khrih thawng in miding ah cohlan a si a fian ni cu a caah thawngtha bik a theih can a si. Zeicaah Misual dir hmun in miding dir hmun ah, a thimi dirhmun in a nungmi dirhmun ah, sualbia ceih dingmi dirhmun in luatnak a hmuhtu dirhmun ah khrih thawng in a hmuh cang a fiannak a petu Thawngtha a si.

Cucaah Paul nih Thawngtha kong hi hi ti hin a nunnak ah a biapimi a si zia kha a chim lengmang. “Khrih Jesuh sal le Pathian nih a Thawngtha chim awkah a thim i a auhmi lamkaltu keimah Paul nih ca kan kuat hna. Cu Thawntha cu Pathian nih hlanpi in a profet hna sinin a rak kan kamh i Cathiang chung i a rak i tialmi kha a si i cucu a Fapa kan Bawipa Jesuh Khrih kong kha a si. Minung lei in ti ahcun David hrinsor a si, thlarau lei in le a thiannak kong in ti ahcun, thawnnak nganpi in thihnak in thawhter a sinak nih khan Pathian Fapa a si kha a langhter. Amah thawngin Pathian nih lamkaltu sinak kha a ka pek i miphun kip chungmi kha zumhnak le Pathian nawlngaihnak i phakter awkah a ka fial” (Rom 1:1-5).

“Thawngtha hi ka zahpi lo, zeicahtiah a zummi vialte hna caah Pathian khamhnak hmual a si, Judah mi hna caah a si hmasa i cun Jentail mi hna ca zongah a hung si. Cucu zeitindah a hung si ti ahcun, Thawngtha nih cun Pathian nih zeitindah minung kha Amah he aa remter hna ti kha a langhter i Cathiang nih, ‘Zumhnak thawngin Pathian he aa remmi cu an nung lai,’ a ti bang khan, Pathian he i remnak cu a hram in a dong tiang zumhnak thawngin a si (Rom1:16).

Pathiam hmai ah minung kan sinak dir hmun cu nawlbia chung bia pakhat a buarmi cu nawlbia a dihlak in a buar a si ko (James 2:10). Cucaah Pathian hmai ah thiltha  zeihmanh a tuah kho lomi kan si  lo, Cu bantuk dirhmun kan si lio thengte ah Paul nih fian nak a tuahmi cu, “Zeihmanh a tuah kho lomi kan si ko lioah khan, cu caan thengte ah cun mi tha lomi kan caah Khrih kha a thi. Mi tha caah cun thih ngamh zong an um phum hnga nain a dingmi ca i thih cu a harmi thil a si. Asinain Pathian nih cun zeitluk in dah a kan dawt kha hitihin a langhter: kannih cu misual kan si ko rih lioah hin Khrih cu kan caah a thi. A thihnak hmanh nih Pathian he a kan remter ahcun zeitluk in dah Pathian thinhunnak chung cun amah nih cun a kan khamh chinchin lai. Kannih cu Pathian ral kan rak si, sihmanhsehlaw a Fapa thihnak thawngin a hawi ah a kan ser cang. Atu cu Pathian hawikom kan si cang caah Khrih nunnak nih cun zeitluk in dah a kan khamh chinchin lai. Cu lawng cu a si rih lo, kannih cu Pathian hawikom i a kan sertu kan Bawipa Jesuh Khrih thawngin Pathian ah cun kan i lawm” (Rom 5:6-11).

Paul nun a uktu hi thawngtha a si. Ni hin ah Pathian khamhnak a fiang cangmi hna nun a hruaitu cu Thawngtha hi a si. Nan nunnak hi mi sual sinak thawng chia chung in khrih ruangah khamhnak na hmuh nak nun a ngeimi na si ahcun na nun hruaitu cu khrih a si lai i na hmurka in Paul bantukin nun cu khrih a si ko ti in na chim khawh ve hnga.

Bawipa nih thluachuah pek ko seh.

21.2.2021 ah chimi a si.