NUN CU KHRIH A SI

Baibal cherhchanh: (Filipi 1:21)

Bia hmaithi.

Nun cu khrih a si timi Paul bia a si. Amah a fianmi kha a mah lila nih a nunning a hung fian hnu ah a chimmi a si. Pathian timhmi a si bantukin khrih nih a tlin termi le khrih Jesuh vawlei ah a rat hnawh chanmi a si i kumkhat chung cawn in i nun pi khawh ding in Pathian nih a bia hmang in khrifabu a kan thimpiakmi a si ti ruah bu in thazaang lak cio ding in kan sawm hna. Nun cu khrih a si ko timi sullam phun 4 in langhter in fianter ka rak i zuam lai.

1.Nun cu khrih a si timi a sullam pakhatnak cu khrih thawngtha phuan hi asi.

Paul nih a chimmi cu “Zeicahtiah nan sin i ka um lioah khan Jesuh Khrih le vailam i an thahnak kong dah ti lo cu a dang zeihmanh ruah le khah kaa timhmi a um lo (I kor 2:2).

Paul nih JESUH KHRIH kong dah lo cu tiah a chimmi nih hin Khrih dah ti lo cu a nunnak ah a biapi deuhmi a um ti lo. Amah cu ka Pathian a si i ka nun uktu zong a si ti kha a langh ter. “VAILAM I AN THAH NAK KONG dah ti lo cu” a ti tik ah hin, Kei ka nunnak cu  Jesuh nih a ka dawtnak  kong le mi vialte  cung ah dawtnak a ngeihnak kong chim le sunpar nak vialte Amah sinah rat pi lengmang kha si ko. Cucaah Paul hi Biakinn ah siseh, Thawnginn ah siseh, lam cungah siseh tiva kam ah siseh, khual a tlawnnak ah siseh Jesuh dawtnak kong a  chim. Thlam ser in pawcawmnak rian a tuan pah zongah khrih dawtnak kong a chim.Thiangthlaru thawn nak le a thil ti khawhnak vialte kha hmang in a sunparnak mi vialte hmai le Amah Pathian hmai ah langhter rian a tuannak nih hin Paul nun hi khrih nih a uk ti hi kan hmuh khawh. A nun cu khrih kong chim nun nih a mongh tinak a si. Zei tik can hmanh ah khrih he ai then bal lo nun ka si ko caah hi kei ka nun cu khrih a si a tinak hi a si. Kan nih ve zong kan nun hi khrih nih a uk ko kan langhter khawh biknak cu kan umnak hmun poh khrih kong chim le mi dang hngalhter hi a si.

 Bawipa mi, zumhawktlak a simi hna cu, zeitluk in dah an that! Anmah he umti cu kaa lawmhnak ngan bik a si (Salm 16:3). Mi sinah zeibia dah na chim tawnmi thilri a phorhtertu maw na si khrih thatnak na chim i mi thawnnak a pektu dah na si. Paul cu khrih thawngtha hi siangpahrang hmaiah, ralkap hmai ah, ram uktu hmai ah, tlangbawi hna hmai ah, Philosopher hna hmai ah, Judah mi hna hmai, ah Jentail mi hna hmai ah, nu hmai ah, ngakchia hmai ah, pa hmai ah zei tik can paoh ah a chimmi nih hin nun cu khrih a si ko ti hi a mah zong nih a theih pin ah mi zong nih an theipiak.

2. Nun cu khrih a si ti sullam cu khrih nawlcawn in nun hi a si a ti.

Jesuh a chimmi le a tuahmi hi Paul nih chim le tuah a duh. “Cucaah cun kei zong nih Khrih nawl ka cawn bantukin nannih zong nih ka nawl kha i cawn ve u (1 Kor 11:1).

Jesuh zong nih “Ka seihnam kha i bei u, kei cu nunnem le mitoidor ka si caah ka nawl hi i cawn ve u; cun dinhnak kha nan hmuh lai (Mathat 11:29).

Jesuh nih a pa nih a fialmi tlamtling ter a zuam baktukin Paul zong nih hin Jesuh cawnpiakmi le a duhnak kha mi sinah chunzan i din loin langhter le chim kha a si. Jesuh nih a bia a tanh i biatak kha mi sinah a langhter. Paul zong nih mi vialte cung ah dawtnak a ngeih mi cu khrih dawtnak an co khawh cio nakhnga sia herhnak ruangah a si. Jesuh nih Mary le Marta le an ta Lazaruh hi a dawttuk hna an i komh tuk ti kan hmuh. An i hawikom tukmi phen ah Pathian biatak hngalter a duhnak hi biapimi a si.  Jesuh khrih an sin a rak leng lioah an u nau an thil tuahmi hi taksa le thlarau kong fianternak a chimh hna ti kan hmuh. Marta nih Jesuh cungah dawtnak a langhternak cu rawlthaw tein pek kha a si.

Ni hin kan i dawtnak micung ah kan langhter kan timi hi an herhmi rawl pek thilthenh zawn ruah bawmhchanh hi a si. Mary nih cun Jesuh bia chimmi kha thate in a ngaih i Jesuh nih cun Mary nih thil dik cu a thim cang a ti daih ko. Cun an tapa thih zawt in a zawt lioah an caah a ra lo. Taksa zawn ruahnak a si ah cun a rak tli colh hnga asinain Pathian thilti hawhnak kha hmuhter a duh hna ti a langhnak cu a thih hnu tu a ra i a thawhternak ah khan a lang. Cucaah Pawl nih Jesuh nawl a cawn bantukin khrih nunnak nih kan nun hi a uk ve a si ahcun taksa dawtnak in mi kan dawtmi nakin khrih dawtnak theih le hngalhter duhnak zawnruah  dawtnak in mi  dawt hi  nun cu khrih nun a si ti langhtertu a si.

Lamkatu cauk chungah kutka dawh i mizeng pa Peter le Johan nih an chimmi bia hi zoh tikah suingun chawva kan ngei lo an ti. Voikhat thawngtha chim hmanh ah mi thawg thum khrih lei kirter khotu Pathian mi hman peter hi zei ruangah dah cawhva a ngeih lo. A sia herh bikmi siseh law Pathian nih pek hna loin a um hnga maw. Pakhat hmanh an i keng lo. Asinain kan ngeihmi kan i pek lai an ti. A herh bikmi cu  khrih dawtnak theihter kha a si. Chawva nakin khrih kong theih in dawt nak langhter cu a nun a si.

3. Nun cu khrih a si ko ti sullam cu khrih ngeih duhnak ah cun zeizong vialte hlonh ngam le kaltak ngamnak hi a si.

Hi kong he pehtlai in tehte a khan mi pakhat cu “Sihmanhsehlaw cu thil vialte, ka ca i miaknak ah rel khawhmi hna cu, Khrih ruangah sungh ah ka rel dih hna. Cu lawng cu an si lo, a dang vialte zong kha sungh cikcek ah ka rel hna, cu thil hna nakin a sung deuh tukmi ka Bawipa Khrih Jesuh hngalhnak ruangah cun sungh cikcek ah ka rel hna. Khrih cu ka co khawh nakhnga le Amah he cun kan i pehtlaih khawh nakhnga, Amah ruangah cun zeizong vialte hi ka hlonh dih hna, an dihlak in hnawmtam ah ka rel hna. Keimah dinnak timi, Nawlbia zulhnak thawngin hmuhmi phun kha, ka ngei ti lo, a tu cu Khrih zumhnak thawngin pekmi dinnak, Pathian sinin a ra i zumhnak chungah aa bunhmi dinnak lawng kha ka ngei cang” (Filipi 3:7-9).

Jesuh nih a kan cawnpiak rihmi cu “Cun Jesuh nih a thawh hna i, “A inn siseh, a lo siseh, a unau si hna seh, a farle si hna seh, a nu siseh, a pa siseh, a fale si hna seh, keimah le thawngtha ruangah a kaltakmi nih cun, tam chinchin in atu chan ah hin a hmuh hrimhrim lai. Inn siseh, lo siseh unau si hna seh, far siseh, nu siseh, fa siseh; a let za khat in an hmuh lai; cun hremnak zong an hmuh lai; cun a ra dingmi chan ah hin zungzal nunnak an hmuh lai” (Mark 10:29-30).

Nun cu khrih a si ko timi sullam cu Paul bantukin khrih cu kan nun hnawhchan kan kawltung bik, kan hmuitinh ngan bik, le  kan tuahmi   poh ah hin a sunparnak langhtetu sinak nun hi a si, Vawlei le vawlei nih a chuah pimi nunnak vialte hlonh  i kal tak i  kan nun  mit cu khrih ah chiah nun cu nun cu khrih a si ko ti langhtertu an si hna.

 

Pathian nih thluachuah pek ko seh. Amen

26.07.2020 (Sermon) a si.