NA CHUNGKHAR AH KIR

Inn chungkhar ah kir uh sih law thawngtha chim hna u sih (Lamkaltu 20:20). Hi kong hi Tahnak pathum in chim ka duh.

1.       Jesuh a tap.

Khuapi cu a hei naih chin lengmang i a hei hmuh tikah a tah i, “Nihin ah hin daihnak caah zeidah a herh ti kha hei hngal law cu mu! Sihmanhsehlaw cucu na hmu kho tung lo. Zeicahtiah na ral nih raltuknak chuntlung in an in kulh i an in hren i a kenkip in an in luhhnawh caan kha a phan lai. Nangmah le na vampang kulh chung i a ummi minung hna cu an in hrawh dih cikcek hna lai: Pathian cu nangmah khamh awkah a rat caan kha na hngalh lo caah cuka hmun ah cun aa chonhmi lung pakhat hmanh leh loin an kaltakmi a um lai lo (Luke 19:41-44).

Ngaihmanh u! Pathian zaangfahnak hmuh caan cu atu hi a si i khamhnak hmuh ni cu nihin hi a si! (2kor 6:2) 

2.       Rachel a tap

Rachel cu afa le ruang ah a tap leng mang i ngam khawh a si ti lo. “Ramah khua chungah thawng a thang, Cu thawng cu tahnak le ainak thawng a si. Rachel nih a fale cu a tah hna, An dihlak in an thih dih caah a tap lengmang ko i ngamh khawh a si lo”ti hi a si (Mathai 2:18).

Ramah cu Bethlehem in Meng 5 a hlatnak a um. Isreal mi Benjamin phun an umnak hmun a si. Bethlehem lei kalnak lam cungah ummi a si. Genesis chungah a tuanbia tak tak kan hmuh. Rachel le Jacob a pu sin in an chuak i chuah kehnak lei kalnak lam ah a ummi a si. Bethel khua cun an i thawh i Efrath khua in hla nawn an si rih lioah khin, Rachel cu a nau ngan a fak i a zualhma ngaingai. Cuti i a ngan a fah lioah cun, nau hlawmtu nu nih khan, “Na thinphang hlah, fapa na ngei than,” a ti. Cun a thaw hmanung bik sinah cun, a cahpah khin, “Ben-oni run ti u,” a ti, asinain a pa nih cun, Benjamin tiah a min cu a sak (Geneis 35:16).

Rachel thi cang lai a pawimi a fa zong a thi cang lai. Thihman nunman ka ngei lo a ti hohmanh hnemh khawh a si lo. Asinain Midwife nu nih ruahchannak um lonak a um lo lioah fapa na ngei timi nih a tahnak a khua ruah harnak vialte caah ruah channak le lawmhnak khua a hung deiter than i a min ah Ben-oni run ti u a ti. Nihin ah kan fale caah ruah channak ngei lo a tap a hrammi khuaruan harmi nan um maw? Kan um awk a si. Asinain hi kan fale caah ruahnak a kan pek khotu cu kan Pathian bia a si. Zei bantukin a hakmi lungthin zong tit bantu in a nemter khotu Pathian a si. Seitan nih seh ding le ei dingin hmun kip ah a bawh lio ah Seitan kaa a phih kho tu cu Pathian a si. Chaindeih kaa a phih khotu cu Pathian a si. Daniel hmaiah Chaindaih hmurka phih a sinak cu Daniel thlacamnak le a zumhnak thawngin a si. Atu hi Rachel bantukin kan fale caah kan tah can a si i Pathian  sinah bawmh kan hal can cu a si. Nihin kan tap laawng ah hmai lei lawmhnak kan co khawh lai.

Mathai chung ah Rachel a tap than. Zei caahtiah kumhnih tang ngakchia vialte thah  a si caah aho hmanh ngamh khawh loin Rachel a tap. Nihin kan fale nuncan ruah ah hin tahpi phu a si. (Bawipa Jesuh nih Jerusalem a tahnak cu a sining ding a theih caah a si). Asinain Jesuh cu Herod kut chungin an luat. 

Zeicahtiah Bawipa vancungmi pakhat cu Josef sinah khan a mang ah a lang i, “Tho law, ngakchia le a nu kha i kalpi hna law Izipt ram ah va zam u. Cun chuak cang u, kan ti hna hlantiang cuka ah cun va um u. Herod nih ngakchia hi thah awkah a kawl lai,” tiah a ti.Josef cu a tho i ngakchia le a nu cu Izipt ram i zampi awkah zan ah khan a thawhpi hna. Cuka ah cun Herod a thih tiang an um. Hi thil cu Bawipa nih profet ka in, “Ka Fapa cu Izipt ram in chuah awkah ka auh,” a timi bia tlinnak caah khan a si (Mathai 2:18). 

3.       Izip ramah zei tik hmanah a tlung than ti lo ding tah ai hramnak a tlung

Moses nih khan Faro cu, “Bawipa nih hitin a ti, ‘Zan tim hrawngah khin Izipt mi hna lakah ka chawk lai i Izipt ram chung i fater a simi paohpaoh kha an thi lai, Faro rocotu a bawi thutdan cung i a thu dingmi fater thawk in facang rialnak lung i facang a rialmi salnu fater tiang an thi lai. Satil hna fater vialte zong an thi ve lai. Hi hlanah a um bal lo i hmailei zongah a um bal lo ding aihramnak kha Izipt ram chung dihlak ah a tlung lai. Sihmanhsehlaw Israel mi hna lakah cun uico nih minung siseh satil siseh a auh hna thawng hmanh a leng lai lo; cucaah Bawipa nih Izipt mi le Israel mi cu ka thleidan hna kha na hngalh lai,’ a ti,” tiah a ti. Cun na bawi vialte hna hi ka sinah an ra lai i ka hmaiah an kun lai i, ‘Nangmah le na mi hna cu va kal ko u,’ tiah an ti lai (Exodus 11:4-8). 

Thihnak rawhralnak cu ni hin hmun kip ah a chawk cang. Aho hmanh a hrial lo. Aho mit hmai zong a zoh lo. Inn chung khar ah zei tik hmanh ah a tlung bal lomi hmai lei zongah a um bal lo dingmi aihramnak  nih a kan naih cuahmah i kan tawn cuahmah cang. Cu tluk in siangpahrang inn chungkhar facang a rialmi salnu fater tiang an thih lio ah cun a mi hna Isarael mi hna sinah thinphannak pakhat hmanh a um lai lo. Uico satil siseh minung siseh an aihram hna ti thawng te hmanh a lang lai lo ti asi.

Zei caatiah Himnak hmuh duh ah cungnung bik kha a fuh mi le Lianngan bik huphennak  chung ah a dormi nih cun; Hmuh lomi thil tih nung vialte thih ak zawtnak chung in  him tein an hupphen hrim hrim lai (Salm 91).

Hiti hin an chim. Hmual a ngei bikmi sermon cu a inn chungkhar hip lak in a chim khotu sermon a si an ti. Vawleicung   ah Mah chungkhar kilven le zoh khenhnak in a biapi deuhmi a um ti lo.

Cuticun Jesuh cu an sinah Nazareth khua ah khan a kir i a nu le a pa kut tangah nawl ngai tein a um: Hi thil vialte hi a nu nih a lung chungah aa ken dih. Cun Jesuh cu pum lei in siseh, fimnak lei in siseh, a hung thang i Pathian hmai le minung hmaiah mithmai tha a hmu (Luke 2:51-52) Amen.