BIAKINN HI A THIANGMI PATHIAN UMNAK A SI.

WACCC Pathian Khrihfabu kum 19 kan tlin ni, ni hin ah hin, Khrihfabu hi Pathian nih a dangte in a chiah, a dawt, a thisen in a hamciami monu a ti i harnak tawn siang loin a zohkhen i a kilven i nupithit puai tuah lawng a hngah. 

Pathian nih a mi Isarael mi cungah a langhnak Biakkam hlun cu Biakam thar a tlinnak a thlam a si bantukin Khrihfabu timi cu Pathian nih a thiantermi a si i a umpi bakmi a si. Pathian nih Moses hmangin felfai taktak in a cawnpiak hnanak hmanthlak hi kan Khrihfabu zong nih kan theih khawh nakhnga ni hin kan kum 19nak a tlingmi a Khrihfabu caah chim ka tinhnak cu a si. 

Biakinn aa thawknak

1.  Moses nih thlam biakinn cu Pathian nih a chim bantukin a ser. (Tabernacle of Moses an ti) Egypt ram in an chuah hnu kum 2 1/2 ah an sak i Puan Biakinn a si (Exodus 25:8).

2.   Solomon nih Moses thlam Biakinn cu a sining tein Jerusalem ah dawh taktak in a sak. (440 kum a rau hnu ah a sak) (1 Siangpahrang 5:6).

3.   Jesuh khrih nih Cu Biakinn cu a zumtu hna sinah a dirh. (AD 30 Hrawng ah sak) Lamkaltu (Lamkaltu 2:1ff).

Jesuh nih zei tindah kanmah sinah a tlinter timi chim ka duh. Zei caahtiah Moses nih a sakmi puan Biakinn Solomon nih a sak ve tik ah a silo ningin anmah nih a tha tiah an ruahning an hman tik ah zei tluk in dah a thin a hun ti kha kan hmuh. “Jesuh cu biakinn ah khan a va lut i biakinn chung i chaw a rak zuarmi le a rak cawmi kha a thawl dih hna; tangka thlengtu pawl cabuai le laileng zuartu pawl thutdan kha a leh dih hna i annih cu, “Cathiang chungah, ‘Pathian nih ka inn cu thlacamnak inn a si lai, a ti,’ tiah aa tial. Sihmanhsehlaw nannih nih cun mifir kua ah nan ser cang,” tiah a ti hna. 

Mitcaw mi le kebei mi kha biakinn chungah cun a sinah khan an ra i a rak damter hna. Tlangbawi upa le Phungbia cawnpiaktu saya hna nih khan khuaruahharmi thil a tuahmi kha an hmuh i ngakchia nih, “David Fapa cu thangthat u,” tiin biakinn chungah an au kha an theih tikah an thin a hung i cucaah Jesuh cu, “An chimmi cu na thei maw?” tiah an ti. Jesuh nih cun, “Thei dah e! ‘Ngakchia tete hna le hnuktlai lio bawhte hna kha, na thangthatnak cu na chimter hna,’ tiah Cathiang chungah aa tialmi kha nan rel bal lo maw?” tiah a ti hna. 

Cu tik-ah Jesuh nih hin a rak theih tuk i Hi Biakinn ah hin Nawlngeitu cu Pathian a si ti kha fiang tein a theih caah hi tluk in a cawncangh ngam hi a si. Hi hlan ah a rak um cia a thlam tlinter a sinak kan zoh tuah lai.

1.  Mose thlam a umnak hmun a si lo ah Tabernacle ti mi sullam cu Jehovah dwelling place. Pathian umnak hmun tinak a si.

2.    Pathian um nak Puanthlam

Hi thlam hi Moses sinah Pathian nih felfaite a chimh bantukin a sak caah Pathian cu a chung ah a um tak tak. Hi puanthlam hi Kanan ram a kalnak lam thluan vialte hrauaitu a si. A thianghlim tuk an upat bantukin Pathian kha chunzan in an chawnhnak hmun a si.

 

1. Luhnak: 

Pathian luhnak inn ka kan i palh sual nak hnga lo a biapi tuk. Kut kaa pakhat lawng a um. Jesuh nih Tuu luhnak innka cu keimah hi ka si. Zungzal nunnak kan co khawhnak hnga caah innka pakhat lawng a um ti kha a langhter. 

           2. Raithawinak. 

A thiangmi Pathian he i hawikomh khawhnak dingah cun sualthiang mi si a herh. Misual kan sinak a thianter khotu cu thisen loin thian khawh a si lo bantukin do tlami tu in khangh thawinak an tuah. Tlangbawi lawng nih tuah khawh a si. Mei zong cu Pathian nih pekmi mei a hau. Aron fale Pahnih Nadab le Abihu hi Pathian nawl pek loin mei kheng an lak an van zihmui an toih Pathian sinah an kal pi Pathian a lawm lo mei in a kangh hna. Raithawinak sa zong hi a thiang tukmi a si hmanh ah ningcang le ei ningcang a um i cu bak cu Eli fale nih a duhpoh Pathian duh lo ning an ei. Cun Pathian kutka luh dingah a hngakmi nu pawl kha hnahnawhnak an pek. An sualpi caah Pathian nih a thah bak hna. Cucaah Paul nih Pathian biakinn nan si kha nan hngalh i Pathian Thlarau nan chung i a um zong kha nan hngalh.  Cucaah aho hmanh nih Pathian biakinn cu a hrawh ahcun, amah cu Pathian nih a hrawh ve lai. Zeicahtiah Pathian biakinn cu a thiangmi a si i nanmah hrimhrim cu biakinn cu (1 Kor 3:16) Raithawinak tlangbawi nih an tuah tik ah sualthiannak cu Kum khat ca lawng a si. Asinain Jesuh Khrih nih Pathian duhmi kha a tuah caah, voi khat ah za lak in Amah a pum aa pekchanhnak thawng khan kannih cu kan sualnak in a kan thianh cang. (Hebru 10:10).

         3. Sual thianhnak: 

Rai thawinak kut ka luhnak ah Kheng chung ti in thiang tein i tawl hnu lawng an lut. (kheng hi Darsen in an tuah mi a si. Hi darsen hi nu thlanag a bih nak a si. Thlalang a um lo. An tat an tat i thlalang ah an ser an i bihnak ah an hman mi a si. A langhtermi cu zei tin can poh misual kan si hi kanmah tein kan i hngalh awk a si. A hnommi kha ti tawl hnu lawng ah a thiangmi hmun ah luh khawh a si lo caah Iithianh a si bantukin Pathian hmai ah sual i ngaichih i mah le i thianh dih hnu ah Pathian hmai ah chuah ding hi a si. Nifa   tuahmi sual kan ti lai cu.

        4. Biaknak (Worship)

Holy Place (A thiang mi hmun) Cucaah ka u le ka nau hna, Jesuh thihnak thawngin Hmun Thiang Bik chungah khan luhnak nawl kan ngei cang. (Hebru 10:19) Biak inn cu a thiang nak hmun Pathian um nak hmun a si ca ah Biakinn ah Amah Biak ding ah kan kal cu Amah Pathian upatnak pek i Thangthat kha a si. Zei caahtiah cu hmun ah cun a thiangmi Pathian cu a um. Buanthlam biakinn chung ah,

 

a. Table of Show bread (Chanreu kheng chung ah changreu pahleih hnih a um) Isreal mi aiawh in Pathian he pum khat sinak langhternak tlangbawi nih a ei (John 6:25). Nunnak changreu cu keimah hi ka si. Ka sa a ei i ka thi a dingmi paoh cu ka chungah an nung i kei zong an chungah ka nung ve (Johan 6:55).

b.     Branch Lampstand (Tengpasarih ngei mi meipasarih) Hi mei hi zei tik hmanh ah a mit bal lomi ceunak a pektu a si. A langhtermi cu Thiangthlarau umpinak thawng in thlarau khua a kan hmuhter khotu a si. Thiangtharau nih a thiangmi Pathian duhnak a kan hmuhter khawh. Cu ceunak cu a zungzal in kan nun a kan ceuter i Pathian duh ka theih khawhnak hmuhsaktu a si.

c.   Alter of Incense: Sui inn tuahmi zihmui kheng hi a alh pengmi mei chung in zihmui hna Pathian ngaihthiamnak tling kan hmuh cang ti langhternak. A dawtnak a ngaihthiamnak chungah lawmhnak le hngangamnak Pathian hmuiternak a si.

    5. Holy of Holy: 

(thiang chin) Thiangchin hmun ah tlangbawi cu kum khat voikhat a lut i raithawinak a tuah. Pathian he remnak ni a si i kumkhat ah voikhat lawng a si. Sualnak vialte ngaihthiam dingin Pathian  he remnak ser ni a si. Ceunak an chiah lo, Pathian a herh ning in ceunak a pek hna, Tlangbawi sang a lut ni ah cun a leng lei ah zei hman tuah a um lo, Isreal mi vialte hmun thiang lei hoih in Tlangbawi pa a chuak lai i zei dah Pathian sin in a theihmi a um hnga i a kan chimh hnga ti kha an hngah dih. Lunglomh tein an chuak, Ngaihthiam chawnh biak khawh lo can ah a thih hna an thih pah a si.

Puanthlam pawng ah seh hmang tamtuk a um caah ral vialte an hmuh khawhnak hna Pathian nih Minmei in mei ceu tak tak in a ceuh dih hna. Chun he zan he cu minmei cu lam hruaitu a si.

Jesuh khrih cu nizan le nihin le zungzal in Amah ning a si (Heb 13:8). Cucaah chan le ni minung aa thleng zongah kan Baibal aa thleng lo caah Chan nih kan zumhnak hi kalpi le hruai si loin aa thleng lomi Pathian biatu nih kan hruai ko seh.

Puanthlam cu Pathian a umnak hmun a thiangmi a si bantukin Biakinn hi a thianter le tihzah le Pathian umnak a si timi hi kan thih tiang theih peng u sih.

Kan pum cu Pathian biakinn a si a thiangmi a si caah Pathian thlarau umnak hmun cu thiangter u law Pathian hi zalawng tein kan nun inn hi hmangter hna u sih (1 Kor 3:16). Hrawh ve kan sinak hnga lo.

 

Bawipa nih thluachuah pek ko seh, Amen