torsdag 2. februar 2017

ThawngTha an Tial mi

Thlarau mit in khua cuan uh. Filipi ; 3 : 7 

John Za Thleng

Filipi cauk hi Warren W Wirbe nih cun “ Be Joyful” lunglomhnak cauk ati,William Barclay zong nih,Duh anung bik mi cauk asi ati, lunglomhnak ca kuat an ti,Lunglomhnak kong hi voi 10 bak te hi cauk ah hin a nolh,Paul nih hin Ilawm uh,Ka nolhthan rih lai.(Filipi 4 : 4) Rejoice in the lord,and again I say Rejoice).Adonghnak ah ka u le ka nau hna Bawipa ah cun I lawm ko uh.ati hna.Philipi 3:1 
Hihi PaulBBQ rawhpah in atial mi asi loh,TV zohpah in, Biasawngtlorh pah in atial mi cauk asi loh, Paul hi Pathian (Jesuh) a zumh hnu in Khrih ruang ah, kum tampi thong a tla, rul nih a cuk,Ahawi le nih an hlawt, an vuak, an tuk, lung in thi seh titian in an cheh, umnak le riahnak hmanh a ngei loh ,Tim le khuamang ah heh tiah a zam, A thil an phoih,an tuk,paul cawnpiak nak hi lih lawng te, a hman lomi cawnpiaknak asi, tiah a domi tampi an um, a thangthatmi an um loh, amah tein saphaw puanthlam a thi I a tak mi asi,aho sin hmanh in bawmhnak ka hal hna loh ati, harnak hi aum ek in a tuar ve, adonghnak ah thong an thlak I an thah,Tutan zong hi Rome thong a tlak lio ah a tial mi asi.Paul nih hin bia an ka ceih lai I an ka thanh lai tihi ai theih,Ka thihnak ding a nai cang ti zong hi I theih dawh asi. 

Philipi 1 : 21- 26 ah cun, Ka caah nun hi zeidah asi, thih hi the zeidah asi,cucaah thil pahnih kar ah kai tenh thih nak le nunnak kar ah kai tenh hih ati mi kha asi. sihmanh shelaw cu ti I harnak le thihle lohnak ton ding asi lio bak ah I lawm uh ati,kei mah zong kai lawm ko hih, kan nun zong ah Bawipa ca, ka thih zong zong bawipa ca asi, ati.I lawmko uh tiah voi 10 bak atial. 

Zeiruang ah dah ai lawm khawh? Timhmi pakhat lawng angeiai

Paul hi Single mind angei mi asi,Paul nih ati lengmang mi cu kei cu timhmi pakhat lawng ka ngei,hnunlei thil kha philhtak in hmailei kawltung lei ah ka tli ati,Filipi 1 :21 zong ah “timhmi pakhat lawng ka ngei ka nun ah, ka thih ah Bawipa ca,Nun hi khrih asi, Thih zong hi khrih asi ati, Aruang cu Vawlei thil vialte, chaw le va vialte nih hin zungzal nunnak aphak pi kho tu zeihmanh aum loh ti atheih tuk,Vawlei thil le ri vial te hi buaipi tlak an um loh, kan nunnak hi khrih lo cun nunngam ding asi loh ti kha atheih tuk, kan nunchung nak in kan thih hnu lei khi alet in asauh lai caah timhcia tein nunnak hman aherh ti kha ai fian tuk caah asi.Khrih ruang ah ka nung, khrih ruang ah ka dam tihi ai fiang tuk,Cucaah anih cu khrih calawnglawng ah anunnak ahman, aton mi vialte hi thlarau mit in acuanh dih I zeipoah kha khrih ruang ah asi,Thong atlak zong ah khrih ca, an vuak zong ah khrih ca, a thut ah ,a dir ah, akalnak kip ah atuah mi vialte hi Jesuh khrih he ai pehtlai dih mi asi, Bawipa caah ka tuah ti mi lungput he atuan caah asi, Golose 3: 23 zeithil nan tuah poah ah minung caah si lo in, Pathian caah ka tuan tihi ruat u law biatak tein tuan uh ati. 


Application : kan hmuhning nih hin thil tampi aser siam. 
 Cucaah nu le pa u le nau hna, kan thut zong ah Bawipa ca, kan dir zong ah bawipa ca, kai pumh mi le ka thawhlawm vialte zong, mi ka bawmh mi zong hi bawipa ca an si, ka nu pi le ka fa le zong hi bawipa ca, rian ka tuan mi zong bawipa ca,kan inn le kan lo zong hi bawipa ca, lawngte an si ti kan hmuh thiam aherh ngaingai.Zeiruang ah dah kan I lawmhkhawh loh, zeiruang ah dah lawmhnak tling kan hmuh khawh lo tiah cun nan tuah mi kha pei minung caah asi rua nan ti cu,Nan tuah mi poah hi Pathian nih bia an ceih te hna lai hih, nan tuar mi vial te zong hi Pathian an hmuhpiak ko hna, atha bik laksawng an chiahpiak ko hna, kan mah lawng nih kan theih rua, kan tuar rua tihlah uh Bawipa nih an theih ko, tihi asi. Kan nunnak le kan zeizong vialte hi Pathain caah ka tuan tihi kan ruah awk aherh ngaingai ko.Thlarau mit in cuanh lo ah cun kha pawl kha hmuh khawh asi loh. 

2.Kan fimthiamnak le kan thilti khawhnak hi 
 Acung ah kan chim cang, Filipi 3 : 4 – 6 Paul cu vawlei mit cun Miza taktak Farasi cawnpiak tu , mifim, le mi thiam, minthang upat mi asi nain,anunnak ah lawmhnak le hnangamnak taktak angei loh,a din felnak nawlbia lei ah soiawk umlo,Benjamin asi nak vialte, arak I uanngai mi le ai phorhlawtnak le ai uahnak tepawl kha ,khrih dawtnak ahuntheih I thlarau mit in a cuanh tikah cun Puanchia tlek tluk hmanh asi loh, ati.Fihnung an si ati,hnawmtam men an si ati.Pathian atheih hlan ah khan cun cuarpar tan ee, kha ee, Benjamin phun ee, Isreal ee, rom mi ka si ee, Cawnnak ah Dr tiang ka si, Mirum chung kan si, cawnnak le rank ah cun Judah mi vial te lak hmanh ah cungnuing bik bak ah kai tel ee,pa za , mi fim aitinak le ai uah nak vialte kha Jesuh he an I ton hnu ah, thlarau mit in ahung cuanhthan tikah cun ningzak thil lawng te an si ati. Filipi 3: 6- cuvial te cu sungh cikcek ah ka rel hna I cu vial te kai phortnak vialte cu hnawntam men an rak si ati. Pathian hmai ah hin khabantuk pawl kha fihnung an si, hna hnok men an si, nihchuak men an si. 

Application : 

 Cucaah thlarau mit in khua kan cuanh hi cu aherh taktak, nangmah kha van I chek ta hmanh, Vawlei mit in kan cuanh ah cun kan miring holh thiamnak, barawhzat te tangka kan ngei mi le thil kan theih pah luklak mi te hna, kan Doctor sinak, kan Rev sinak, Asst pastor kan va sinak,kan B SC.Kan BA, Ware house ah Senior ka si tinak tehna, Hightschool ka kai tinak tehna,kan I dawhnak te hna, holh let kan sinak tehna, Zathang ee, cinzah ee,cu phun kha phun ka si tinak,apa cu hlanlio cubantuk tinak tehna,mirum chung an si tinak te hna, hmaihngal ngai I kan I uah pi rih ko ah cun thlarau mit in khua kan cuanh than ding ah kan sawm hna,Hivial te kan I phorhlawt ngai I kan I uah pi mi hi cu nihchuah men khi dawh an sicuh, Pawl nih cun hruhbia asi ati cuh, hnawmtam men asi, ningzak ngaingai a si ati. Cuti nan ti ah cun nangmah nak in dawh ka zat deuh leh cuh ati cuh. 

 Thlarau mit in aminung fimthiam nak le sining a hun I zoh tikah cun salvia te lak ah santlai lo bik ka si ati khawh cang.Cutikah cun mipi nih an eih khawh cang,Pathian nih a hman khawh cang, Kan ei khawh I kan co khawh nak hnga Jesuh zong Bethlehem ah pei a chuah cu, Thlarau mit in kan nun kan cuanh lawng ah kan nun hi ei khawh mi asi lai. Philipi 3 : 19 An Pathian cu pumsa duhnak kha asi ko,ningzah awk asi mi thil kha phorhlawtnak ah an hman ati.

Ingen kommentarer:

Legg inn en kommentar